இந்திய ஹாக்கி வீரர்களுக்கு பிரதமர் மோடி வாழ்த்து | Asian Champions Trophy | Narendra Modi

சீனாவின் ஹூலுன்பியர் நகரில் நடைபெற்ற 8-வது ஆசிய சாம்பியன்ஸ் கோப்பை ஹாக்கி போட்டியில், இந்தியா, சீனா, பாகிஸ்தான், தென் கொரியா ஆகிய அணிகள் அரையிறுதிக்கு முன்னேறின.

இந்திய அணி 4-1 என்ற கோல் கணக்கில் தென் கொரியாவை வீழ்த்தி 5-வது முறையாக இறுதிப்போட்டிக்கு முன்னேறியது. மற்றொரு அரையிறுதியில், சீனா 2-0 என்ற கணக்கில் மூன்று முறை சாம்பியனான பாகிஸ்தானை வீழ்த்தி முதல் முறையாக இறுதிப்போட்டிக்கு முன்னேறியது.

இறுதிப்போட்டியில், இந்தியா மற்றும் சீனா அணிகள் மோதின. இந்திய அணி தொடக்கம் முதல் ஆதிக்கம் செலுத்தியது. ஜுக்ராஜ் சிங் ஆட்டத்தின் 50-வது நிமிடத்தில் கோல் அடித்து இந்திய அணியை 1-0 என்ற கணக்கில் முன்னிலையில் வைத்தார். சீனா பலமுறை முயற்சித்தும், பதிலடி கோல் அடிக்க முடியவில்லை. இதனால், இந்திய அணி 1-0 என்ற கோல் கணக்கில் சீனாவை வீழ்த்தி 5-வது முறையாக கோப்பையை வென்றது.

இந்த வெற்றியை முன்னிட்டு, பிரதமர் மோடி இந்திய ஆண்கள் ஹாக்கி அணிக்கு வாழ்த்துகளை தெரிவித்தார். அணியின் சிறப்பான செயல்பாடு, மனவுறுதி மற்றும் அர்ப்பணிப்பு தேசத்திற்கு பெருமை சேர்த்துள்ளதாக அவர் குறிப்பிட்டார்.