தவெக-வில் இணைந்த ஆதவ் அர்ஜூனா மற்றும் அதிமுக நிர்மல் குமார்!

சென்னை பனையூரில் உள்ள தமிழக வெற்றிக் கழக அலுவலகத்தில் நடந்த விழாவில், ஆதவ் அர்ஜூனா, மற்றும் நிர்மல் குமார் ஆகியோர் தமிழக வெற்றிக் கழக கட்சியில் இணைந்தனர்.

ஆதவ் அர்ஜூனாவுக்கு தேர்தல் பிரிவு பொதுச்செயலாளர் பதவியும் நிர்மல் குமாருக்கு துணை பொதுச்செயலாளர் பதவியும் வழங்கப்பட்டு உள்ளது.

நடிகர் விஜய்யின் த.வெ.க., தொடங்கி ஓராண்டை எட்ட உள்ளது. இந்நிலையில் கட்சியில் காலியாக உள்ள பதவிகளுக்கு நிர்வாகிகளை நிரப்புவதில் விஜய் அதிக கவனம் செலுத்தி வருகிறார்.

சில தினங்களுக்கு முன், விஜய்யை அவரது பனையூர் அலுவலகத்தில் லாட்டரி மார்ட்டின் மருமகனும், வி.சி.க., முன்னாள் நிர்வாகியுமான ஆதவ் அர்ஜூனா சந்தித்து பேசினார்.

இந்த சந்திப்பின் மூலம் அவர் தவெகவில் இணைய இருப்பதாக பேச்சுக்கள் வந்த வண்ணம் இருந்தன.

இந்நிலையில், இன்று (ஜன.,31) சென்னை பனையூரில் உள்ள தமிழக வெற்றிக் கழக அலுவலகத்தில் நடந்த விழாவில், ஆதவ் அர்ஜூனா கட்சியில் இணைந்துள்ளார். அதேபோல், அ.தி.மு.க., ஐ.டி., பிரிவு இணைச் செயலாளர் நிர்மல் குமாரும் விஜய் முன்னிலையில் த.வெ.க.,வில் இணைந்தார். ஆதவ் அர்ஜூனாவுக்கு தேர்தல் பிரிவு பொதுச்செயலாளர் பதவி வழங்கப்பட்டு உள்ளது.

நிர்மல் குமாருக்கு துணை பொதுச்செயலாளர் பதவி வழங்கப்பட்டு உள்ளது.

முன்னதாக ஆட்சியில் சம பங்கு என விஜய் பேசியதை விசிகவின் துணைப் பொதுச் செயலாளராக இருந்த போது ஆதவ் அர்ஜூனா வரவேற்றார்.

இதனைத்தொடர்ந்து கட்சித்தலைமையின் எண்ணத்துக்கு மாறாக அவர் பேசிய கருத்துக்கள் சர்சையை கிளப்பியது.

தி.மு.க., மற்றும் விசிக இடையே மோதல் சூழல் உருவானதை தொடர்ந்து ஆதவ் அர்ஜூனா கட்சியில் இருந்து சஸ்பெண்ட் செய்யப்பட்டார். இதனையடுத்து அவர் அக்கட்சியில் இருந்தும் விலகினார் என்பது குறிப்பிடத்தக்கது.